Libros

Comentarios

Victoriano Taibo obsequiou en 1955 ao médico oftalmólogo Antón Beiras García cun entrañable agasallo para os fillos, un volume manuscrito que contiña oito contos populares aos que o mestre galeguista dera forma literaria. Beiras García, comprometido coa causa galeguista, quixo educar aos seus fillos en galego. Inculcarlles a lectura e a escrita en galego non era doado naquel tempo porque carecía de material axeitado, así que mercaba libros en portugués. Por eso, Victoriano Taibo,amigo persoal de Beiras decidiu escribir, encadernar e obsequiar ao médico con aquela obriña única que titulou “Contos pequenos”, dedicada ao fillo Hixinio.

O IEM ofrece agora este opúsculo na súa versión orixinal acompañado de catro artigos de diversa índole un deles do propio Hixinio Beiras Cal, fala das súas lembranzas daquela época. Camiño Noia Campos incardina os contos dentro da folclore internacional mentres que Gonzalo Navaza Blanco fai un estudo do léxico e das expresións empregadas; e Xesús Alonso Montero cóntanos a historia externa do manuscrito.O volume incorpora ao final un glosario das palabras que, sendo galegas, non se atopan no dicionario da RAG e unha versión actualizadada do texto dos contos coa dobre finalidade de facilitar a lectura do manuscrito e de que sirva como libro de lectura para cativos en idade escolar, ilustrado por Fino Lorenzo.

Este volume, concibido como unha unidade, desmémbrase en tres libros que poden ser lidos independentemente, facilitándolle ao lector o uso que desexe facer da información aquí ofrecida. Conteñen, respectivamente, as partes comentadas máis arriba, é dicir, a edición facsimilar, o conxunto de artigos de acompañamento e a versión actualizada. Unha faixa envolvente que serve de portada do conxunto, deseñada igualmente por Fino Lorenzo, consegue a unidade antes mencionada.