Libros

Comentarios

Este libro é o resultado da investigación histórica realizada nos arquivos de traballo do laboratorio fotográfico de Virxilio Viéitez. Recolle as súas fotografías realizadas entre os anos 1955 e 1965, na Terra de Montes, nos lindes das provincias de Pontevedra e Ourense e supón un importante labor de recuperación da fotografía popular galega, de enorme valor, tanto desde a perspectiva de recuperación documental como de potenciación dos sinais de identidade da cultura autóctona.

Ás veces pode pensarse que os traballos fotográficos máis interesantes atópanse só nos arquivos dos estudios importantes das cidades, esquecendo inxustamente aos fotógrafos que traballan nas localidades pequenas e que ata con medios máis modestos poden chegar a ter unha obra de excepcional interese. Ese é o caso de Virxilio Vieitez, quen sen dúbida ocupa un lugar destacado na historia da fotografía española. El foi o fotógrafo por excelencia das poboacións e aldeas da comarca de Terra de Montes.
Nos seus retratos, caracterizados pola frontalidade e o estaticismo, chama a atención a capacidade para plasmar a gran expresividade dos retratados. O seu traballo garda un claro paralelismo coa fotografía norteamericana dos corenta e cincuenta que el descoñecía completamente.