Libros

Comentarios

Nas investigacións recentes e actuais sobre Historia Contemporánea de Galicia atribúese cada vez maior importancia ás primeiras décadas do século XX, considerándoas xeradoras dun impulso económico, social e cultural que resultou bruscamente cortado pola Guerra Civil, para encontrar finalmente a súa culminación a partir dos anos sesenta do mesmo século. Nesta óptica sitúase o presente traballo que, circunscribindo o seu campo de investigación ás catro primeiras décadas do século XX, afronta o estudio do período sinalado baixo a perspectiva optimista da "modernización" e do "cambio social", características que obviamente deberán amosarse con máis claridade en sucesivos volumes, dedicados respectivamente á economía, cultura, evolución política e organización social de Galicia ó longo do período indicado. O tratamento de cada dimensión da problemática histórica realízase mediante o sistema de textos e documentos, precedidos cada un deles dunha breve introducción específica e todos en conxunto, dunha ampla introducción xeral. No presente volume, dedicado á Emigración, abórdanse temas como as causas e efectos da emigración, o debate de comezos do século XX sobre o problema migratorio, as remesas de diñeiro americano, a emigración intrapeninsular, o asociacionismo desenvolvido polos emigrantes en América e a súa proxección política. O presente traballo pretende poñer nas mans de estudiantes e afeccionados á Historia os documentos básicos para a adecuada interpretación e comprensión da historia máis recente de Galicia.