Libros

Comentarios

Karel Capek é un dos escritores checos máis sobranceiros do século XX. A súa ampla obra abrangue moitos xéneros: contos para nenos, relatos de viaxes, literatura realista, filosofía, relatos fantásticos, obras teatrais e ficción científica. Caracteriza a súa obra, por unha banda, o seu senlleiro sentido do humor, unha fina ironía presente en gran parte da súa obra e tamén unha voz que advirte dos perigos do totalitarismo, o incipiente fascismo que ameaza a nova Checoslovaquia, como por exemplo en Bílá nemoc ('A enfermidade branca'), onde fala dun terrible mal contaxioso que se espalla rapidamente, así como temas tan actuais como a mecanización do ser humano na sociedade industrial ou as armas de destrución de masas.

Como se prepara a terra dun xardín? E que sementes cómpre mercar sen falta este ano? Como plantarlle cara a unha mangueira rebelde á hora de regar un xardín? Hai algo que un apaixonado da xardinaría poida facer durante o frío inverno para que non sucumba á morriña polo seu xardín, mergullado no branco letargo invernal? Karel Capek dedícalle este libriño a todos aqueles amantes da xardinaría: ofrece consellos sobre os traballos, as ledicias e as preocupacións de quen lle profesa amor á xardinaría, dando ademais instrucións mes por mes sobre as tarefas ás que cómpre dedicarse.