Libros

Comentarios

Presentamos, un texto en continuo reaxuste. Un texto que hoxe xa non é o da estrea e que mañá xa non será exactamente o que agora editamos. Un texto vivo, que, necesaria e inevitablemente, só recolle unha parte do espectáculo, pois a commedia é ante todo xogo e acción, elementos que renunciamos a tentar transcribir, sabedores de que, por moi detallada que fose a descripción, esta non pasaría de ser unha pobre e moitas veces farragosa referencia.
Aportamos tamén o texto literal do canovaccio (simplemente traducido) para que o lector se remita a el se o precisa, comprobando así como ese material previo constituíu un punto de partida sobre o que se dispararon, desde o pracer e a liberdade creativa, os mecanismos da praxe escénica para levarmos ó escenario un producto en continua evolución: un espectáculo de commedia dell ' arte.
Con el homenaxeamos a Goldoni, e non só durante o ano 93, senón por todos os anos en que o público, a súa e a nosa principal razón creativa, queira disfrutar co noso espectáculo. Unha homenaxe de cómicos, de xentes de estaribel e carro da farsa. Por iso quixemos que o noso espectáculo levase un título así de simple, pero así de expresivo: Commedia.
E porque o traballamos xogando, brincando coa palabra, coa música, co movemento, cos espacios, cos obxectos, coa cor, coa imaxe e co ritmo, como nos gusta... non podía levar outro subtítulo: Un xoguete para Goldoni.