Libros

Comentarios

As vivencias e as experiencias que constitúen a memoria da adolescencia son as que nutren Casas baratas. Un libro de contos co que Antón Riveiro Coello se debruza sobre o tempo no que se forma a personalidade e sobre o que se constrúe a memoria individual.



Un libro que esperta lembranzas a través duns realtos nos que se rescatan historias e emocións inesquecibles.





Enfiados por un mesmo narrador e cun escenario común, a vila de Xinzo da Limia en pleno franquismo, os relatos de Casas baratas fan xurdir, con intensidade e humor, gorentosos episodiosn nos que historia persoal e colectiva se mesturan e enrriquecen mutuamente. Antón Riveiro Coello reconstrúe con mestría todo un mundo de sensacións e vivencias, converte a literatura no único acobillo do home. O autor de As rulas de Bakunin manexa os diferentes rexistros do conto, desde o humor ao dramatismo, pasando polo misterio e a iniciación no amor, sen deixar de sorprender en todo momento.





O mundo de Casas baratas é o mundo da infancia e dos inicios da adolescencia Riveiro Coello nárrao desde os ollos dun rapaz, cunha mirada que no cotiá descobre o misterio e nos sentimentos sinxelos atopa a paixón de vivir. Os contos deste libro reconcilíannos coa realidade, fannos sentir o paso do tempo non coma unha carencia senón coma unha experiencia que enriquece e da sentido ao vivido. Literatura auténtica escrita desde as emocións que perduran.






Titulares de prensa
















CASAS BARATAS

Memorias e infancia





Atendemos desde hai anos con interese e especial atención as propostas narrativas do escritor limiao Antón Riveiro Coello, quen a estas alturas ofrece un estimábel e sólido percorrido, bibliográfico como demostra nos últimos anos: A quinta de saler, animalia, As rulas de Bakunin, Homonima, A esfinxe de Amaranto entre outras publicadas entre os anos 1998 e 2003.





Casas baratas pode lerse tanto como unha colección de relatos autónomos e estreitamente conexionados polo co protagonismo da voz narradora, ou coma se se tratase dunha auténtica novela que presenta un avance cronolóxico progresivo coa presenza de personaxe e dun universo xeográfico e emocional que lle confiren unidade; fóra do feliz lugar común na súa obra como é o ricaz e vizoso tratamento lingüístico que neles sempre amosa.





Deste xeito en Casas baratas o autor aborda con dodes de sensibilidade e meneidade, un tema de non doado manexo, como é a recreación maioritariamente autobiográfica de feitos e personaxes que poboaron a súa infancia e a súa mocidade.


Mais esta visión confesional, con todo o que posúa de ficción, que interese pode ter para o lector? Moito sen dúbida moito. Alén das anécdotas puntuais que aquí se revelan, alén do exercicio de esculca nos máis agochados e privados recantos do pasado do autor, o libro constrúe ou reconstrúe moi polo muído, cunha prosa crómatica envexable, un espazo vivencia como é o de Xinzo de Limia.





Casas baratas é un monllo de situacións que beben na memoria, cheas de forza reveladora para retratar un tempo, un lugar, unha vida que agora é compartida e que se transmite con emoción e indiscutible eficacia.





Ramón Nicolás


Xoves 9 de marzo de 2006


Faro de Vigo. Faro da Cultura