Libros

Comentarios

Dentro do currículo aberto e flexíbel do que se parte, os distintos tipos de contidos (conceptuais, procedementais, actitudinais) foron secuenciados en tres grandes bloques con diferentes unidades en cada un deles. No primeiro bloque reflexionamos sobre o concepto do Estado español e o seu devir histórico. No segundo, abordamos desde unha perspectiva ecoxeográfica as variábeis físicas que configuran as paisaxes do territorio español. No terceiro centrámonos nos factores socioeconómicos e a súa implicación nas paisaxes.En consonancia cos presupostos epistemolóxicos mencionados, fuximos da acumulación gratuíta de datos estatísticos. Confundir xeografía con outras ciencias sociais como a socioloxía ou a economía é un erro desgraciadamente demasiado frecuente. Non debemos esquecer que a xeografía ten como referente a comprensión do espazo, e polo tanto os datos numéricos teñen utilidade na medida en que contribúen a este fin. Alixeirar o texto destas listas e táboas estatísticas axiliza a súa lectura, e, neste sentido, esta opción ten tamén un fundamento didáctico.Moitas das actividades propostas pretenden precisamente achegar ao alumnado ao manexo de fontes de información xeográfica, invitándolle a levar a cabo pequenos traballos de investigación que o axuden a comprender mellor o espazo no que viven.